Ana torroja

 Ana Torroja Fungairiño (Madril, 1959ko abenduaren 28a) espainiar abeslaria da. Mecano musika-taldeko kidea. Ikertzaile handi baten biloba da, eta Madrilgo Bide Ingeniaritzako Eskolako zuzendariaren alaba. Ekonomia-ikasketak egiten hasi zen, baina bertan behera utzi behar izan zituen musikaren munduan buru-belarri sartu zenean. 1984an, Arte eta Dekorazioko ikasketak egiten hasi zen, baina karrera hura ere ez zuen bukatu. 1978an, José Cano eta Nacho Cano anaiak ezagutu zituen, eta Mecano taldea osatu zuen haiekin. Hiru urtez aritu ziren maketak prestatzen, musikaren merkatuan sartzeko ahaleginean. Azkenik CBS multinazionalak diskoa grabatzeko aukera eskaini zien. 1981ean, Hoy no me puedo levantar diskoa kaleratu zuten, eta bat-bateko arrakasta handia izan zuen. Harrezkero, oso ezagun egin zen Mecano, Espainian ez ezik baita Latinoamerikan, Italian eta Frantzian ere. Beste lan aipagarri batzuk hauek dira: ¿Dónde está el país de las hadas?, Ya viene el sol,Hawai-Bombay (1986), Entre el cielo y el suelo (1987), Descanso Dominical (1988) eta Aidalai (1991).

Ainara Amilibia